كتبت الشاعرة المبدعة سوزان محمد نص بعنوان..... وليه الناس تحسدني.....
قصيدة ( و ليه الناس بتحسِدنى )
=====================
و ليه الناس بتحسِدنى
و دايماً بِيَّا مشغولة
عشان بَاضحَك كتير يعنى
و دمى خفيف و عَسّولة
و بَاكتِب شعر و بَاغَنِّى
و شيك و جميلة و خجولة
خلاص يفتكروا بقا إنى
فى كوكب تانى معزولة
لا حاجه فْ يوم بتِشغِلنى
و لا فْ قراراتى مسئولة
لكن صدقاً و باعلِنها
فى جملة بسيطة معقولة
لا انا من كوكب المريخ
و لاااا عايشة فى كبسولة
و لاااا أنا عايشة فى الجنة
و كل مشاكلى محلولة
حيالله يادوب أنا إنسان
حياتى عادية مقبولة
و ياما قابِلت انا أحزان
بافَضَّل تِبقى مجهولة
و ياما بكيت ورا جدران
فى دنيا بِيبانها مقفولة
لكن بَاعرَف أعيش إحساس
و أغَيَّر مُوودى بسهولة
و أغَيَّر مُوود جميع الناس
مشاعرى بقلمى موصولة
و بيه بالْمِس قلوب الناس
حروفى بصِدق مغزولة
يحب كلامى كل الناس
بدرجة كبيرة و مهوولَة
لكن جوايا ١٠٠ طفلة
بريئة و كلها طفولة
أغَنِّى فْ ٣٠٠ حفلة
و أعيش الحالة ببطولة
ساعات أفرَح و أتنَطَّط
ساعات زهقانة و مَلولة
و بَاضحَك أيوَه من بَرَّا
لكن جوايا مقتولة ... #بقلمى #سوزان_محمد
تعليقات
إرسال تعليق